CEBU, Philippines — Ang Pinay nga si Nesthy Petecio nakaipsot batok ni World No. 1 Yu-Ting Lin sa Chinese Taipei sa ilang sangka sa Round of 16 sa women's boxing featherweight division sa 2020 Tokyo Olympics kagahapon didto sa Kokugian Arena sa Japan.
Si Petecio mipakugang ni Yu-Ting pinaagi sa kulbahinam nga split decision, 3-2, aron pag-angkon og luna sa quarterfinals.
Ang tulo ka judges parehong mi-iskor og 29-28 pabor ni Petecio samtang ang duha midapig ni Yu-Ting sa susamang iskor hinungdan sa split decision.
Gumikan niini, si Petecio nanginahanglan na lang og usa ka daog aron pagseguro sa Pilipinas og bronze medal.
Makab-ot kini sa Dabawenyo kon ugaling iyang mapilde ang Colombian nga si Yeni Marcela Arias Castaneda sa sunod niyang away karong Miyerkules.
Kon ugaling buligan sa maayong palad, si Petecio motunol sa Pilipinas sa labing una niining medalya sukad si Mansueto "Onyok" Velasgo mibira og silver niadtong 1996 Atlanta Olympics.
Sa men's flyweight category, ang kababayan ni Petecio nga si Carlo Paalam mibuntog sa mas taas ug mas dako niining kontra nga si Brendan Irvine sa Ireland pinaagi gihapon sa split decision. Apan sukwahi kang Petecio, upat ka judges ang mipabor ni Paalam samtang usa lamang ang dapig ni Irvine
Sa pagtikang ni Paalam sa Round of 16, duha na lang ka daog ang iyang kinahanglan aron pagseguro sa Team Phl og bronze medal.