Mama mohagit ni IBF champ Edwards

CEBU, Philippines — Lain na sab nga Pinoy'ng boksidor ang mo-away alang sa world title.

Sa labing dako nga hagit sa iyang karera, si Jayson "Smasher" Mama sa Sanman Gym mohagit ni IBF flyweight champion Sunny "Showtime" Edwards karong Septiembre 11 didto sa Copperbox Arena sa London, England. Way duda nga usa kini ka kulbahinam nga engkuwentro tali sa duha ka way pidleng mga boksidor.

Si Mama, 24, wa pay tatsa sa 16 ka away uban ang 9KOs, samtang si Edwards nagkupot sab og perpektong 16-0 record uban ang 4KOs. "Sunny Edwards is a great champion but I like Jayson's chances," matud pa ni Sanman CEO Jim Claude "JC" Manangquil, ang manedyir ni Mama. "Jayson is very hungry and he will do everything to be a world champion."

Sulagma kaayo nga sila Mama ug Edwards parehong katapusan mi-away niadtong Abril 30 ning tuiga.

Sa maong adlaw, si Mama midaog pinaagi sa technical decision batok ni Romshane Sarguilla dito sa Sanmam Gym sa General Santos City.

Samtang didto sa York Hall sa London, England, ang 25-anyos nga si Edwards mipakurat sa kanhi way pildeng South African champion nga si Moruti Mthalane aron sakmiton ang IBF flyweight belt.