Hawks gidagit ang Bucks

CEBU, Philippines — Si Trae Young mipaulbo og career playoff high 48 puntos uban ang 11 ka assists ug pito ka rebounds sa dihang gipakuratan sa Atlanta Hawks ang inilog nga Milwaukee Bucks, 116-113, sa pasiunang duwa sa ilang best-of-seven NBA Eastern Conference Finals kagahapon didto sa Fiserv Forum sa Milwaukee, Wisconsin.

Mibubo si Young og 12 puntos sa katapusang kuwarter apil na niini ang duha ka free throws sa hilimatyong segundos nga nahibilin sa duwa nga maoy nagtuldok sa makapakurat nilang kadaogan.

Ang Bucks nakalabaw pa unta og siyete puntos, 105-98, apan sila si Young, John Collins, ug Clint Capela nagtambayayong paglusad og mainit nga 14-6 rally nga nakapalabaw og balik sa Hawks, 112-111, sa pinal nga 29.8 segundos sa aksiyon.

Duna pa untay tsansa ang Bucks nga makapuwersa og overtime apan nasipyta ang tres ni Khris Middleton dayong kapupos sa oras.

Si Young giabagan ni Collins nga dunay 23 puntos ug 15 ka rebounds samtang si Capela miamot og 12 puntos ug 19 ka rebounds sa Hawks.

Si Giannis Antetokounmpo mipabuhagay og 34 puntos, 12 ka rebounds, ug siyam ka assists samtang si

Jrue Holiday dunay 33 puntos ug 10 ka assists alang sa Bucks nga laraw manimawos sa Game 2 karong Sabado didto gihapon sa ilang korte.