Suns nakalingkawas sa LA Clippers;2-0 na

CEBU, Philippines — Si Deandre Ayton mihansak sa bola sa nahibilin nga usa ka segundo sa duwa samtang ang nagkadugo nga si Devin Booker mi-iskor og 20 sa dihang ang Phoenix Suns nakalingkawas batok sa Los Angeles Clippers sa makapaisa'g balahibo nilang Game 2, 104-103, kagahapon didto sa The Valley sa Phoenix, Arizona.

Mikuha sab og atensiyon si Cameron Payne nga mipabuhagay og career-high 29 puntos alang sa Suns nga mi-inat sa ilang labaw ngadto na sa 2-0 batok sa Clippers sa ilang best-of-seven NBA Western Conference Finals.

Sa kulbahinam nga panapos sa sikit ug tensiyonado kaayong aksiyon, si Suns forward Jae Crowder milabay sa bola tungod nga basket diin ang milayat nga si Ayton nagpaabot dayong dunk niini sa nahibilin nga .7 segundos.

Si Paul George misuway pa unta pagsalbar sa Clippers apan wala masud ang iyang tira dayong kapupos sa oras.

Ang bayani sa Suns nga si Ayton mitapos uban ang 24 puntos ug 14 ka rebounds.

Si George mihipos og 26 puntos samtang si Reggie Jackson midugang og 19 puntos alang sa Clippers, nga naglaraw manimalos sa Game 3 karong Biyernes didto sa ilang korte.

Duna gyud unta'y tsansa ang Clippers nga modaog ug tablahon ang serye apan si George nasipyat sa duha niya ka krusyal nga free throws sa pinal nga 8.2 segundos.