Bucks sa East finals

CEBU, Philippines — Si Giannis Antetokounmpo mikadlit og 40 puntos ug 13 ka rebounds sa dihang gipakaging sa Milwaukee Bucks ang Brooklyn Nets,  115-111, sa kulbahinam nga Game 7 nga milanat og overtime sa NBA Eastern Conference semifinals kagahapon didto sa Barclays Center sa New York.

Nasadya na unta ang fans sa Nets sa dihang si Kevin Durant milansang sa iyang buzzer beater nga nagduso sa duwa ngadto sa overtime,  109-109, atubangan sa 16,200 ka fans didto sa Barclays Center sa New York.

Si Antetokounmpo mipasud og 15 sa 24 niya ka itsa nga maoy nakaaabag og dako sa Bucks.

"I want to be great," matud pa ni Antetokounmpo. "We had to give everything. We know we were going to be  tired at the end of the game."

Si Durant dunay 48 puntos, siyam ka rebounds, ug unom ka assists sa pilderong kawsa sa Nets.

"We got looks, we just didn't knock them down," dason pa ni Durant.

Ang Bucks moabante sa Eastern Conference finals diin ilang sangkaon ang modaog sa serye tali sa  Atlanta Hawks ug Philadelphia 76ers nga magtiwas karong adlawa.

Si Khris Middleton midugang og 23 puntos ug 10 ka rebounds alang sa Bucks, nga nahimong labing unang team nga mdaog sa korte sa kontra sa Game 7.