Clippers mihimo'g kasaysayan

Mitaak sa NBA West Finals sa labing unang higayon

CEBU, Philippines — Si Terance Mann mikadlit og career-high 39 puntos sa dihang gitagak sa Los Angeles Clippers ang inilog nga Utah Jazz, 131-119, sa Game 6 sa ilang best-of-even NBA second round playoff series kagahapon didto sa Staples Center sa Los Angeles, California.

Gihuman sa Clippers ang serye sa baraha nga 4-2 aron pag-abante sa NBA Western Conference Finals sa labing unang higayon sa 51 ka tuig nga kasaysayan sa ilang prangkisa.

Si Paul George mihipos og 28 puntos samtang si Reggie Jackson midugang og 27 puntos alang sa Clippers nga mipiog sa Jazz sa miaging duha ka duwa bisan og wala ang superstar nilang si Kawhi Leonard kay duna angol sa tuo niining tuhod.

Dalaygon kaayo ang Clippers nga nagmilagro human malubong og 25 puntos sa sayong bahin sa ikatulong kuwarter dayon na ngadto sa pagpalagpot sa Jazz. Si Mann maoy responsable niini human mipaulbo og 20 puntos sa maong kuwarter diin ilang gibanatan ang Jazz.

Sangkaon sunod sa Clippers ang Phoenix Suns. Ang Game 1 sa ilang best-of-seven West finals gikatakda karong Lunes didto sa korte sa Suns.

Sa Eastern Conference, sila si Tobias Harris ug Seth Curry parehong mitali og 24 putnos samtang si

Joel Embiid dunay 22 puntos ug 13 ka rebounds sa dihang ang Philadelphia 76ers naka-angkon pa og laing kinabuhi human gibalian og pako ang Atlanta Hawks, 104-99.

Ang Sixers ug ang Hawks mag-abot sa katapusang higayon sa tinagakay nga Game 7 karong Lunes sa homecourt sa Philadelphia.