Gilas gipakuratan ang Korea; Indonesia maoy sunod target

CEBU, Philippines — Si Samjosef Belangel milansang sa krusyal niyang 3-pointer dayong kapupos sa oras sa dihang gipakuratan sa batan-ong Gilas Pilipinas ang bisitang South Korea, 81-78, sa kulbahinam nilang duwa sa FIBA Asia Cup qualifiers niadtong Miyerkules sa gabii didto sa AUF Gym sa Angeles City, Pampanga.

Mao kadto ang labing unang daog sa Pilipinas batok sa Korea sud sa walo ka tuig.

Padung na unta sa overtime ang makapaisa'g balahibo nga aksiyon human si Hyungjung Lee miposa og tres aron tablahon ang iskor, 78-78, sa nahibilin nga dos segundos.

Apan si Belangel mihimo og usa ka dakong milagro pinaagi sa pagpasud sa malisud niyang tres taliwala sa hugot nga depensa sa mga Koreano nga nagtuboy sa Gilas ngadto sa naglagiting nga kalamposan ug ingon man nagbayaw sa tibuok nasudnong Pilipinhon ngadto sa dili hitupngan nga himaya.

Uban sa upat ka sagunson nilang daog, ang Gilas hingpit nang naka-angkon og luna sa FIBA Asia Cup.

Si Dwight Ramos maoy nangu sa Gilas uban ang 16 puntos, samtang si Kai Sotto miamot og 11 puntos, pito ka rebounds, duha ka assists ug usa ka steal.

Wala sab magpatibin ang naturalized player sa Gilas nga si Ange Kouame nga mi-igo og tulo sa lima niya ka tres aron pagtapos uban ang 12 puntos.

Sunod puntariyahon sa Gilas ni coach Tab Baldwin ang Indonesia sa alas-6 sa gabii karong adlawa.

Mosamot pa unya og kalig-on ang puwersa sa Gilas gumikan kay paduwaon naman ni Baldwin ang laing PBA Gilas draftee nga si Jordan Heading.

Sa una nilang engkuwentro niadtong Pebrero 2020 didto sa Jakarta, gilampaso sa Gilas ang Indonesia, 100-70.