Durant nag-wild: Mipaulbo'g 49 puntos, Nets 3-2 na vs Bucks

CEBU, Philippines — Si Kevin Durant mipabuto og 49 puntos ug way pahuway sa tibuok 48 minutos sa duwa sa dihang ang Brooklyn Nets nakabangon human malubong og 17 puntos dayon na ngadto sa pagpatikalbong sa Milwaukee Bucks, 114-108, sa Game 5 sa ilang best-of-seven NBA Eastern Conference semifinals kagahapon didto sa Barclays Center sa Brooklyn, New York.

Ang 7-footer nga si Durant milangkat sab og 17 ka rebounds ug mipasa og 10 ka asissts alang sa Nets nga mao na sab ang naglabaw  sa serye, 3-2.Mahimo na silang mo-abante sa East finals kon usban og parot ang Bucks sa Game 6 karong Biyernes. Ang tinagakay nga Game 7, kon gikinahanglan, duwaon karong Domingo sa korte sa Nets.

Ang Nets nabiyaan og 17 puntos sa naghinapos nga bahin sa ikatulong kuwarter apan milusad sila og nagkayong 17-5 run nga gisilyohan ni Durant pinaagi sa hagpok niyang tres ug dayon upat ka sagunson nga free throws sa pinal nga dos minutos sa aksiyon nga nakapahagba sa Bucks  sa hingpit. Si Durant mikulit og record alang sa labing daghan nga puntos sa playoffs sa kasaysayan sa prangkisa sa Nets. Iyang gipapas ang karaang marka ni Vince Carter nga mipabuhagay og 43 puntos 15 ka tuig na ang milabay.

Nakigduyog na sab siya karon nilang Hall of Famers Oscar Robertson ug Charles Barkley ug Dallas Mavericks guard Luka Doncic isip mao lamang ang upat ka NBA players nga dunay dili mominus 40 puntos, 15 ka rebounds ug 10 ka assists sa usa ka duwa sa playoffs.

Gawas ni Durant, misalida sab si Jeff Green uban ang 27 puntos ug ingon man si Blake Griffin nga mipupo og 17 puntos sa Nets.

Si Giannis Antetokounmpo dunay 34 puntos ug 12 ka rebounds samtang si Khris Middleton mikimada og 25 puntos sa pilderong Bucks.