Fury mibahad patikangkangon si Wilder

CEBU, Philippines — Ang way pildeng WBC heavyweight champion nga si Tyson Fury mibahad nga moposte og paspas nga daog batok ni Deontay Wilder sa ikatulo nilang panagsangka sunod bulan.

Sila si Fury ug Wilder nag-abot sa usa ka press conference kagahapon didto sa Los Angeles aron i-promote ang giatngan nilang engkuwentro nga gikatakda karong Hulyo 24 didto sa T-Mobile Arena sa Las Vegas.

Apan human gipaila-ila ang duha ka higanteng mga boksidor, bugtong si Fury ang nagpunay og sulti gumikan kay daw sa gikandadahon ang baba ni Wilder nga puwerting hiloma.

Matud pa sa 32-anyos nga si Fury nga ang gibuhat ni Wilder nagpasabot lamang nga klaro kining naapektuhan sa resulta sa miagi nilang away.

Sa ikaduha nilang engkuwentro niadtong Pebrero 2020, gikulata og maayo ni Fury si Wilder sa wala pa kini niya palukapaha sa hingpit sa ikapitong hugna.

Sa una nilang bugno niadtong Disiembre 2018, si Fury gitumba ni Wilder duha ka higayon apan milanat og 12 ka hugna ang ilang sinukmagay nga miresulta ngadto sa usa ka panagtabla.