Giannis, Doncic ug Jokic apil sa All-NBA first team
CEBU, Philippines — Sila si Giannis Antetokounmpo sa Milwaukee Bucks, Luka Doncic sa Dallas Mavericks ug ang MVP nga si Nikola Jokic sa Denver Nuggets naglangkob sa All-NBA first team nga gipahibawo sa liga kagahapon.
Mao kini ang ikatulong sunod-sunod nga higayon nga si Giannis naapil sa maong prestihiyosong seleksiyon. Dugang niini, siya maoy bugtong player nga nakadawat og first team votes sa tanang 100 ka mga balota.
Nagsunod kaniya s Jokic nga dunay 99 ka first team votes ug si Doncic nga dunay 55 ka boto.
Nagkumpleto sa All-NBA first team ning season mao sila si Stephen Curry sa Golden State Warriors ug Kawhi Leonard sa Los Angeles Clippers.
Nasakop sa NBA second team sila si Damian Lillard sa Portland Trail Blazers, Joel Embiid sa Philadelphia 76ers, Chris Paul sa Phoenix Suns, Julius Randle sa New York Knicks, ug LeBron James sa LA Lakers samtang naglangkob sa third team sila si Kyrie Irving (Brooklyn Nets), Bradley Beal (Washington Wizards), Jimmy Butler (Miami Heat), Paul George (Los Angeles Clippers), ug Rudy Gobert (Utah Jazz).
- Latest
