Harden nayayay na sab

CEBU, Philippines — Wala makatiwas og duwa si James Harden sa Brooklyn Nets sa Game 1 sa ilang best-of-seven NBA Eastern Conference semifinals batok sa Milwaukee Bucks kagahapon didto sa Barclays Center sa  Brooklyn, New York.

Kini human si Harden nakahiagum og angol sa iyang paa sa nakaon nga 43 segundos pa lamang sa aksiyon.

Bisan og wala si Harden, midaog hinoon gihapon ang Nets sa iskor nga 115-107 ubos sa liderato ni Kevin Durant nga mipatuasik og 29 puntos.

Matud pa sa Nets nga si Harden ipaubos sa MRI aron pagsuta kon unsa kaseryoso ang iyang injury.

Ang 31-anyos nga si Harden gihamok sa mao gihapong hamstring injury hinungdan nga nakapalta siya og 21 ka duwa niadtong Abril ug Mayo.

Ang Nets dunay 19-17 record kon wala si Harden apan  29-7 sila kon anaa siya sa lineup. Ning season, mi-average siya og 24.6 puntos, 7.9 rebounds ug 10.8 assists. Mipatak siya og 27.8 puntos ug 10.6 assists matag duwa sa dihang ilang gitagak ang Boston Celtics sa unang hugna sa playoffs.