CEBU, Philippines — Ang go-ahead 3-pointer ni John Collins sa nahabiling 24.4 segundos sa duwa nakapabuhi og balik sa Atlanta Hawks ug mibihag sa Washington Wizards, 120-116 sa NBA kagahapon didto sa State Farm Arena, Atlanta, Georgia.
Ang Hawks nga nagtangag og 39-31 nga baraha, misulod na sa Eastern Conference playoffs sa unang higayon sukad niadtong 2017.
Gipangulohan ni Trae Young ang Hawks nga midagit og 33 puntos, samtang si Collins mitapos uban ang 18 puntos. Si Bogdan Bogdanovic milawog og 20 puntos alang sa Hawks.
Si Russell Westbrook misansan og 34 puntos ug mitunol og 15 assists, apan dili kini igo aron malikayan ang laing mangutngot nga kapildihan sa Wizards nga nalabay sa ika-10 sa Eastern Conference standing uban ang 32-38 nga baraha.
Ang Wizards abante og trese puntos, 100-87 nga labing dako nga labaw dihang si Davis Bertans mipataroy og usa ka 3-pointer gikan saa assists ni Westbrook sa nahabiling 10 minutos sa duwa.
Nakubit sa Hawks ang nipis nga labaw, 117-116 human si Collins nakapasud sa iyang 3-pointer.
Si Raul Neto nasipyat sa iyang 10-foot jumper alang sa Washington ug nakuha ni Solomon Hill ang rebound ug gi-foul nga naghatod kaniya ngadto sa free throw line. Si Hill mipasud og usa sa duha ka free throws alang sa ilang 118-116 nga labaw. Nausban ni Hill og laing duha ka free throws aron hatagan ang Hawks og tres puntos nga labaw, 119-116 sa nahabiling 13.2 sa aksiyon.
Gihatagan unta og higayon ang Wizards aron makatabla, apan si Bertans pakyas pagpasud sa iyang itsa gikan sa 3-point range.
Ang usa ka free throw ni Kevin Huerter sa nahabiling 3.7 segundos maoy miselyo sa daog sa Hawks. Wala makaiskor ang Wizards sa katapusang dos ug tunga ka minutos ug nasipya sa katapusang walo ka mga itsa.
Ang Hawks mibihag sa Wizards sa ikaduhang higayon sa tulo ka duwa.
Didto sa Staples Center, si Kyle Kuzma milampos sa iyang mahinungdanong lay-up sa nahabiling 6.9 segundos nga naghatag sa Los Angeles Lakers og 124-122 nga kadaogan batok sa Houston Rockets.
Labaw ang Lakers, 121-113 sa katapusang 2:57 sa duwa, apan ang Rockets mipatuasik og siyam ka sagunson nga puntos aron moposte og usa ka lugas nga labaw, Human mitawag og time ang Lakers, si Kuzma nakakita og buslot nga depensa sa Rockets ug miiskor og go-ahead points.
May purohan pa unta ang Rockets nga makawat ang labaw, apan si Kelly Olynyk gikawatan sa bola ni Ben McLemore sa nahabiling 0.9 segundos. Dayon si Talen Horton-Tucker mibugha og usa sa duha ka free throws.
Si Horton-Tucker mitikdol og 23 puntos ug si Andre Drummond mitimang og 20 puntos ug 10 ka rebounds sa Lakers, kinsa niduwa nga wala silang LeBron James, Anthony Davis ug Alex Caruso.
Sila si Olynyk ug Armoni Brooks parehong miiskor og 24 puntos sa 16-54 nga Rockets, samtang si Kenyon Martin Jr. mipabuto og 20 puntos.