Laurente makigsinukliay og kumo ni Puton

CEBU, Philippines — Ang walay pildeng si Criztian Pitt 'Golden Boy' Laurente sa General Santos City gikatakdang makigsinukliay og kumo ni Vergil 'Strong Man' Puton sa Polomolok, South Cotabato sa Mayo 29 didto sa Tanaw de Rizal sa Laguna. Walay pilde sa unom ka away uban ang tulo ka knockouts, si Laurente  bag-o lang mihaw-as gikan sa "unanimous decision" nga kadaogan batok ni Ernesto 'Chocolate' Saulong, kinsa moharong sa walay pildeng si Carl Jammes 'Wonder Boy' Martin (17-0, 15KOs) sa Ifugao sa main event.

Si Laurente nagbansay-bansay sa ilang kaugalingon gym Laurente High Camp sa General Santos City. Nihimo siya og sparring session sud sa walo ka hugna niadtong Lunes. Sa iyang bahin, ang 31-anyos nga si Puton nidaog sa bakanteng Philippine Boxing Federation (PBF) super featherweight title  batok ni Marbon Bodiongan pinaagi sa technical knockout sa ikaunom nga hugna didto sa Muntinlupa niadtong 2016.

Pabilin niyang gihuptan ang titulo human nidaog batok ni Eduardo Mancito  pinaagi sa "unanimous decision" niadtong  2017 sa Muntinlupa. Niadtong 2018, si Puton nakigbinukbukay ni Landy Cris Leon, apan ang away miresulta ngadto sa technical draw hinungdan nga nagpabilin sa iyang mga kamot ang titulo.