CEBU, Philippines — Nakakuha og katungod si Filipino rower Cris Nievarez nga mopresentar sa Pilipinas sa umaabot nga Tokyo Olympics.Kini ang gipahibalo sa Philippine Rowing Association niadtong Lunes human madawat ang kompirmasyon gikan sa World Rowing.
Ang 2019 Southeast Asian Games (SEAG) gold medalist mopakita'g aksiyon sa men's singles sculls event.
Ang presidente sa Philippine Rowing Association nga si Patrick Gregorio midayeg sa nakag-ot ni Nievarez, ang ikatulong Filipino rower nga moduwa sa Olympics sunod nilang Ed Maerina sa Seoul niadtong 1988 ug Benjamin Tolentino Jr. sa Sydney niadtong 2000.
Si Nievarez maoy ikawalong Pinoy'ng atleta nga nikwalipikar sa Tokyo Olympics ug makig-uban siya nilang weightlifter ug 2016 Rio Olympics silver medalist Hidilyn Diaz, pole vaulter EJ Obiena, gymnast Carlos Yulo ug boxers Eumir Marcial, Irish Magno, Carlo Paalam ug 2019 AIBA women’s world champion Nesthy Petecio. Ang Tokyo Olympics rowing competition gikatakda sa Hulyo 23-30 didto sa Sea Forest Waterway.