Heat may purohan pa sa Eastern playoff
CEBU, Philippines — Mihimo'g double-double si Jimmy Butler uban ang 26 puntos ug 11 ka assists aron tabangan ang Miami Heat pagpakaging sa Boston Celtics, 130-124 sa NBA kagahapon didto sa TD Garden sa Boston, Massachusetts.
Si Duncan Robinson mitikdol og 22 puntos ug si Bam Adebayo mitimang og 20 puntos sa Miami nga labaw og duha ka duwa batok sa Boston alang sa ikaunom nga dapit sa Eastern Conference standing.
Miiskor og 30 puntos si Evan Fournier aron pangulohan ang Celtics, kinsa adunay tulo ka pilde sa niaging upat ka duwa. Si Jayson Tatum miabunog 29 puntos ug si Kemba Walker mikolekta og 18 puntos sa Celtics nga mosuway og likay sa play-in round sa playoffs.
Naglisud ang Celtics sa ilang opensiba kay wala ang ilang All-Star nga si Jaylen Brown, kinsa napalta sa iyang ikatulong sunod-sunod nga duwa tungod sa injury.
Labaw ang Heat og 26 puntos sa first half sa wala pa ang Celtics milusad og 22-8 run pagsugod sa third period aron makitkitan ang labaw ngadto sa 12 puntos. Ang Celtics padayong mikitkit sa labaw, 113-107 sa nahabiling 4:51 sa lay-up ni Walker, apan ang Heat mibawos aron inaton og balik ang labaw ngadto sa 118-109.
- Latest