Hardaway Jr. milansang 10 sa 22 ka triples sa Mavs

CEBU, Philippines — Si Tim Hardaway Jr. mipasud og 10 ka 3-pointers sa iyang 36 puntos, samtang si Luka Doncic mitikdol og 23 puntos sa Dallas Mavericks nga mipuwesto og balik sa ikalima sa Western Conference pinaagi sa pagpabugnaw sa Miami Heat, 127-113 sa NBA kagahapon didto sa Miami.

Si Hardaway Jr. mibalik sa arena diin ang jersey sa iyang amahan gikayabkayab sa salagunting agi'g pasidungog isip Heat legend, mipasud og 13 sa 24 gikan sa field ug 10 sa 18 gikan sa 3-point range.

"Having that honor and that privilege to play under that jersey, it's special," matud pa ni Hardaway Jr.

Si Doncic mihimo sab og 12 ka rebounds ug walo ka assists, si  Jalen Brunson mitampo og 19 puntos, samtang si Josh Richardson miamot og 17 puntos sa Dallas nga adunay 37-28 win-loss record. Nagtabla sila ug ang Los Angeles Lakers, apan ang Mavs ang mipahiluna sa ikalima pinaagi sa tiebreaker.

Sila si Duncan Robinson ug Goran Dragic parehong miiskor og 19 puntos sa Heat nga nagpabilin sa ikaunom nga dapit sa   Eastern Conference.

Niduwa ang Heat nga wala si Jimmy Butler, kinsa gipagawas duha ka oras sa wala pa ang duwa tungod sa simtoma sa flu.

Si Trevor Ariza miposa og 16 sa iyang 18 puntos sa first quarter alang sa Miami. Sila si Gabe Vincent ug Kendrick Nunn mitimbre'g 14 puntos matag usa, samtang si Bam Adebayo mikolekta og 11 puntos, 11 ka assists ug siyam ka rebounds sa nabugnaw'ng Heat.