Lakers balik sa ikalima

CEBU, Philippines — Nabalik sa ikalimang puwesto ang undermanned nga Los Angeles Lakers human miariya og 93-89 nga kadaogan batok sa Denver Nuggets sa NBA kagahapon didto sa Staples Center sa Los Angeles, California.

Si Anthony Davis mikandos og 25 puntos ug pito ka rebounds alang sa Lakers nga miputol sa ilang tulo ka sunod-sunod nga pilde. Abante ang Lakers og 14 puntos sa tunga-tunga sa fourth quarter sa wala pa makitkiti sa Nuggets ang labaw ngadto sa dos puntos, 87-89. Si Davis mipasud sa iyang usa ka jumper sa nahabiling 41.8 segundos diin ang Lakers labaw og kuwatro puntos. Si Nikola Jokic miposa og duha ka free throws aron makan-an ang labaw, apan si Talen Horton-Tucker mihimo og reverse lay-up sa katapusang 15.1 segundos aron hatagan ang Lakers og 93-89 nga bentaha.

Human sa timeout sa Denver, si Davis mibaraw sa 3-point attempt ni Facundo Campazzo nga nakapawong sa paglaum sa Nuggets nga makabawi sa ilang lima ka sunod-sunod nga pilde.

Ang Laker, kinsa adunay unom ka pilde sa ilang katapusang pito ka duwa, niduwa nga wala ang duha nilang sinaligan nga silang LeBron James ug Dennis Schroder.

Si Alex Caruso miamot og 11 puntos ug lima ka rebounds, samtang sila si Talen Horton-Tucker,  Marc Gasol ug Kentavious Caldwell-Pope nag-amotay og 10 puntos sa Lakers adunay 37-28 win-loss record ug nibalik sa ikalima nga posisyon sa Western Conference standing.

Si Jokic maoy nangu sa Nuggets pinaagi sa iyang 32 puntos, gisundan ni Michael Porter Jr. nga adunay 19 puntos.

Didto sa Salt Lake City, ang Utah Jazz milampos pagpilde sa San Antonio Spurs, 110-99 ubos sa pagpangulo ni Bojan Bogdanovic nga mikadlit og 25 puntos.

Si Rudy Gobert miambit og 24 puntos ug 15 ka rebounds, samtang ang Fil-Am nga si Jordan Clarkson mitampo og 16 puntos sa Jazz.

Sila si DeMar DeRozan mipabuto og 22  puntos ug si Rudy Gay mitira og 17 puntos aron sab pangulohan ang Spurs sa napilde sa ikaupat ka sunod-sunod nga higayon. Sa lain pang mga aksiyon, Ang Orlando Magic midaog sa Detroit Pistons, 119-112, gihimulbolan sa Golden State Warriors ang New Orleans Pelicans, 123-108, ang Atlanta Hawks mibihag sa Portland TrailBlazers, 123-114.