Plania nangu kadaogan sa Sanman fighters

CEBU, Philippines — Ang misulbong nga super bantamweight star nga si Mike Plania maoy nangu sa mga mananaog sa Sanman boxers sa labing ulahing yugto sa Sanman Boxing's bubble series didto sa ilang gym sa General Santos City.

Nidominar si Plania batok ni Emmanuel Ogawa gikan sa pagsugod paingon ngadto sa usa ka "shutout" decision nga kadaogan sa ikaunom nga hugna. Tulo ka hurados adunay mipatik og managsamang iskor nga 60-54 alang n Plania, kansang rekord milambo ngadto sa 25-1 uban ang 12KOs.

Ang 24-anyos nga si Plania, kinsa nagkupot sa WBC Asian Boxing Council Silver ug IBF North American super bantamweight belts, milansang sa iyang ikasiyam ka sunod-sunod nga daog sukad nakaangkon sa iyang una ug bugtong pilde sa karera niya sa mga kamot ni Juan Carlos Payano sa Dominican Republic atol sa ilang WBO Intercontinental bantamweight title fight niadtong Marso 23, 2018 didto sa Seminole Hard Rock Hotel and Casino sa Hollywood.

Ang wa'y pildeng stablemates ni Plania nga silang Jayson Mama ug Jade Bornea, nilampos sab sa ilang misyon batok sa tagsa-tagsa nilang kaatbang.

Pagsugod pa lang, gikulata na ni Mama si Romshane Sarguilla, kinsa miundang sa dayong sugod sa ikawalong hugna alang sa referee technical decision (RTD) nga daog para kang Mama, kinsa miinat sa iyang perpektong rekord ngadto sa 16-0 uban ang 9KOs.

Napanalipdan sab ni Bornia ang wa'y tatsa niyang rekord nga 16-0, 10KOs human miiskor og unanimous decision nga daog batok ni Roland Jay Biendima.

Nagmadaugon sab si John Vincent Pangga batok ni Elizer Ambon pinaagi sa unanimous decision sa ilang upat ka hugna nga sangka.