ARQ Lapu-Lapu mipakgang duha ka sagunsong pilde

CEBU, Philippines — Si Monbert Arong maoy milugwa nga bida sa dihang gipakaging sa ARQ Builders Lapu-Lapu City Heroes ang Tubigon-Bohol Mariners, 61-55 aron pagpakgang sa duha ka sagunson nilang pilde sa Visayas leg sa labing unang 2021 Chooks-to-Go Pilipinas VisMin Super Cup season didto sa Alcantara Civic Center sa Alcantara, Cebu.

Sa dihang naalkansi sila og dos puntos, 53-55, si Arong milansang og hagpok nga tres, dayon niiskor sa fastbreak lay-up sa wala pa mipasud sa iyang acrobatic shot sa 7-0 run nga iyang gisolo aron pagpalabaw sa Heroes og singko puntos, 60-55 sa nahibilin nga 17 segundos sa duwa.

Si Arong mihipos og 15 puntos uban ang pito ka rebounds ug duha ka assists alang sa ARQ Lapu-Lapu nga mitak-op sa ilang kampanya sa unang hugna sa eliminasyon uban ang 3-2 win-loss record.

Dako sab og natampo sila si Vincent Minguito ug Fletcher Galvez nga nagkumboya'g 27 puntos alang sa Heroes.

Si Joseph Marquez dunay 13 puntos ug 13 sab ka rebounds alang sa Mariners nga wala pa'y daog sud sa lima ka duwa.

Sa laing aksiyon, ang KCS Computer Specialists-Mandaue City nakaipsot batok sa Dumaguete Warriors, 79-73.

Si Gryann Mendoza mikadlit og 20 puntos ug 10 ka rebounds, si Rhaffy Octobre midugang og 13 puntos, siyam ka rebounds ug tulo ka assists, samtang si Dyll Roncal mitampo og 11 puntos alang sa KCS-Mandaue nga padayong nagsolo sa ikaduhang dapit sa liderato bitbit ang 4-1 nga baraha.