Eumir Marcial mibalik na dinhi sa Pilipinas
CEBU, Philippines — Niabot na dinhi sa Pilipinas si Olympic middleweight qualifier Eumir Felix Marcial gikan sa Los Angeles ug mipatighulog ngadto sa Zamboanga City aron duawon ang iyang masakitong amahan nga si Eulalio sa dili pa mokuyog pag-usab sa Philippine boxing team sa training camp didto sa New Delhi sa Mayo 7.
Kuyog ni Marcial sa flight mao si IBF superflyweight champion Jerwin Ancajas, manager ug trainer ni Ancajas nga si Joven Jimenez ug Jonas Sultan, ang sparmate ni Ancajas.
Sa pagka karon, ang Philippine Boxing team nagbansay-bansay didto sa Thailand ug mobalhin kini ngadto sa New Delhi alang sa laing ensayo ug mosalmot sa Asian Elite Men and Women Boxing Championship sa Mayo 21-31. Si Asian Boxing Confederaton (ABC) president Anas Al Otaiba miingon nga ang kalihukan mosilpi ug motimbang-timbang sa kaandam sa mga boksidor sa Asya alang sa Tokyo Olympics.
- Latest
