Nuggets mibuntog sa Heat

CEBU, Philippines — Ang "triple-double" ni Nikola Jokic maoy naghatod sa Denver Nuggets ngadto sa 123-106 nga kadaogan batok sa MIami Heat sa nagpadayong duwa sa NBA kagahapon didto sa  Ball Arena sa Denver, Colorado.

Si Jokic mipaksit og 17 puntos, 11 ka assists ug 10 ka rebounds alang sa iyang ika-15 nga "triple-double" karon nga season.

Wala sab magpaalkansi si Michael Porter Jr. nga miburak og 25 puntos ug milangkat og 10 ka rebounds sa Nuggets, kansang unom ka  mga magduduwa miiskor og double figures sa unang duwa sa koponan nga wala si Jamal Murray, kinsa dili na makabalik sa nahabiling mga duwa sa season tungod sa injury nga iyang naangkon atol sa ilang kapildihan ngadto sa Golden State Warriors niadtong Martes.

Si Bam Adebayo maoy nangu sa Heat nga midagkot og 21 puntos, gisundan ni Kendrick Nunn nga miduslit og 16 puntos. Si JImmy Butler igo lang mihaling og 13 puntos uban ang siyam ka assists sa Heat.

Ang Nuggets labaw og 11 puntos sa halftime, ug miburot pa ngadto sa 15 puntos sa hinapos nga bahin sa third period. Sila si JaMychal Green ug P.J. Doziers miposa og 3-pointers sa sayong bahin sa final period aron moposte og 20 puntos nga bentaha.

Si Green mhipos og 17 puntos, samtang si Aaron Gordon miamot og 16 puntos ug si Dozier mitimbre'g 15 puntos.

Didto sa Philadelphia, mipabuhagay og 39 puntos si Joel Embiid ug milangkat og 13 ka rebounds alang sa Philadelphia Sixers nga migisi-gisi sa undermanned nga Brooklyn Nets,       123-117.

Wala moduwa sa Nets ang ilang mga sinaligan nga silang James Harden, Kevin Durant, Blake Griffin ug LaMarcus Aldridge.

Si Kyrie Irving miiskor og 23 puntos sa first half nga maoy ikawalo niyang 20-point first half niini nga season ug mitapos sa duwa bitbit ang 37 puntos aron pangulohan ang Nets.

Si Irving wala makaduwa niadtong Miyerkules batok sa Minnesota Timberwolves tungod sa personal nga mga rason.

Lubong og 16 puntos ang Nets, apan mibangon ug mihulga pa og sikit, 118-115 sa nahabiling 1:15 sa duwa, apan anugon lang ang ilang mga paningkamot kay nahutdan sila sa oras.