Suns mitabla sa record

Milansang og 18 ka 3-pointers sa first half

CEBU, Philippines — Si Jae Crowder mibagnos og 25 puntos, samtang si Devin Booker misansan og 24 puntos ug ang Phoenix Suns mitabla sa NBA record nga adunay 18 3-pointers sa first half  sa ilang 126-120 nga kadaogan batok sa Houston Rockets sa  usa sa mga duwa sa NBA kagahapon didto sa Talkstick Resort Arena sa Phoenix, Arizona.

Ang Suns milansang og 81-58 nga labaw sa halftime human mihimo og 18-of-24 ka 3-pointers. Si Crowder maoy naghatag og dakong danyos nga miiskor sa tanan niyang puntos sa first half samtang mipasud og walo sa iyang siyam ka tres.

Sukad masukad, si Crowder wala gyud mapakasud og labaw sa unom ka 3-pointer sa usa ka duwa.  Natabla sa Suns ang rekord nga namugna sa Utah Jazz, kinsa miposa og 18 ka tres sa first  half sa sayong bahin niini nga season sa duwa nila batok sa Orlando Magic.

Haw-ang kaayo ang depensa sa Rockets hinungdan nga nakahigayon ang Suns og pamuntos miposte sa ilang komporabling labaw, 103-88 paghuman sa third period.

Miaksiyon og sikit ang Rockets, 114-109 sa nahabiling 5:45 sa duwa, apan ang Suns mibawos pinaagi sa pagtusak og unom ka puntos.

Si Christian Wood maoy nangu sa Rockets nga mikamada og 25 puntos ug milangkat og 15 ka rebounds, gisundan ni  Kevin Porter Jr. nga mipabuto og 22 puntos.

Ang Rockets walo na'y pilde sa miagi nilang siyam ka duwa, apil na ang katapusang tulo ka sunod-sunod ug nagtangag og 14-40 karon nga season. Ang Suns nidaog og siyam sa 10 ka mga duwa ug mibingat sa ilang daog ngadto sa 38 batok sa 15 ka pilde.