Gilas naghuwat sa pagbalik sa bubble training
CEBU, Philippines — Wala pa'y timailhan kon kanus-an makabalik ang Gilas Pilipinas pool sa ilang ensayo pangandam alang sa final qualifier sa FIBA Asia Cup dinhi sa nasud.
Sumala pa ni Gilas coach Jong Uichico, ang training pool nga gilangkuban sa mga basketbolista sa kolehiyo ug sa special PBA draftees ang maunungong naghuwat sa mando gikan sa Samahang Basketbol ng Pilipinas (SBP).
Bisan og ang NCR Plus gipaubos na sa Modified Enhance Community Quarantine (MECQ) gikan sa Enhanced Community Quarantine (ECQ) niadtong Lunes, ang group practices ug training ang gidili gihapon sa kagamhanan segun sa Joint Administrative Order (JAO), Games and Amusement Board (GAB), Philippine Sports Commission (PSC) ug sa Department of Health (DoH).
Nahunong ang ensayo sa nasudnong koponan didto sa Inspire Sports Academy bubble sa Laguna duha ka semana na ang nilabay dihang gibutang og balik sa Enhanced Community Quarantine ang tibuok Metro Manila ug sa mga probinsiya sa Rizal, Laguna, Bulacan ug Cavite tungod sa pagsaka sa kaso sa Covid-19.
Ang FIBA Asia pormal mipahibalo nga ang Pilipinas mo-host sa mga duwa sa Group A (Philippines, South Korea, Thailand ug Indonesia), Group B (China, Chinese Taipei, Japan, Malaysia) ug sa Group C ( Australia, New Zealand, Guam ug Hong Kong) sa Hunyo 16 hangtod 20.
- Latest