Irving dili moduwa tungod sa personal nga rason

CEBU, Philippines — Ang guwardiya sa Brooklyn nga si Kyrie Irving dili moduwa uban sa Nets nga manulong sa Timberwolves didto sa Minnesota karong adlawa tungod sa personal nga rason.

Dili sab makaduwa sa Nets silang LaMarcus Aldridge ug James Harden, kinsa nakahiagom og right hamstring strain sa miaging semana. Si Kevin Durant nga bag-o lang nibalik gikan sa hamstring strain hinungdan nga siya wala makaduwa og duha ka bulan, dili pa sab tugaan og taas-taas nga playing time.

Si Irving kadaghan napalta og duwa sa Nets karon nga season. Niduwa lang siya og 38 sa 53 ka mga duwa sa Nets. Napalta sab siya og upat ka mga duwa tungod sa injury maintenance niini nga season. Si Irving wala sab makaduwa sud sa duha ka semanang niadtong bulan sa Enero tungod sa personal nga mga rason.

Nakalapas sab siya sa coronavirus health and safety protocols sa liga nga nakadelatar sa iyang pagbalik og duwa.

Niadtong Marso, si Irving napalta og tulo ka mga duwa samtang nitambong sa usa ka kalihukan nga may kalabotan sa pamilya.

Si Irving mo-average og 27.6 points, 4.8 rebounds ug unom ka assists matag duwa.