La Sugbo gymnasts misidlak na sab

CEBU, Philippines — Ang batan-on apan masaarong gymasts sa Ritmik Jimnastiks La Sugbo ubos ni coach Darlene de la Pisa mipakita na sab og dalaygon nga pasundayag.

Ning higayona sa 1st MK Rhythmic Gymnastics International Online Competition gipasiugdahan sa Filipino organizers niadtong hinapos nga bahin sa miaging bulan.

Sa kinatibuk-an, ang La Sugbo nga gilangkuban og mga atleta gikan sa mga siyudad sa Cebu, Lapu-Lapu, Butuan, Tacloban ug Surigao mihakot og 11 ka bulawan nga gipalamanan og pito ka silver ug mga bronze medals sa upat ka adlaw nga virtual competition nga gisalmotan sa 121 ka gymnasts gikan sa 22 ka clubs sa unom ka mga nasud.

Sila si Reyanne Corvera, Hannah May Subreviga, Leann Mae Lubang ug Colynne Marie Aguilar mikabkab og duha ka bulawan matag usa kanila sa tagsa-tagsa nila ka mga kategoriya.   Si Corvera nanghawod sa  ball ug clubs, samtang si Subreviga naghari sa ball ug ribbon events sa Senior Level 4.

Sa iyang bahin, si Lubang nidaog ug duha ka bulawan sa ball ug clubs sa Junior Level 4, samtang si Aguilar nikubkob sab og duha ka bulawan sa ball ug clubs sa Pre Junior Level 4.

Lain pang nihakot og bulawan sa La Sugbo mao silang Jaiannah Marqeaux Viros (freehand, Baby), Dominique Rylen Labines (ball, Developmental Level 3) ug Leanne Marie Manning (ball, Junior Level 4).

Niadtong miaging semana, ang La Sugbo mipakita sab og maayong performance sa Club Heymo International Friendship Cup nga gipasiugdahan sa Mexico.