Embiid, Simmons wala paduwaa sa NBA All-Star Game

CEBU, Philippines — Pakyas sa pagpakita sa ilang kahayag ang mga bitoon sa Philadelphia 76ers nga silang Joel Embiid ug Ben Simmons human sila gipapha sa NBA All-Star Game tungod sa Covid-19 contact tracing protocols    

Sila si Embiid ug Simmons gikataho nga na-exposed sa usa ka barbero didto sa Philadelphia nga nagpositibo sa coronavirus sayo sa buntag kagahapon.

Nibiyahi ang duha og ka magduduwa sa Atlanta, ang dapit sa All-Star Game human sa ilang  pagpatupi sa maong barbero.

Gipaubos sila sa testing kagahapon ug si  Philadelphia coach Doc Rivers miingon nga wala pa siya makaseguro kon hangtod kanus-a silang Embiid ug Simmons magpabilin sa Atlanta.

Ang 26-anyos nga si Embiid nag-average og 30.2 points ug11.6 rebounds sa 30 ka mga duwa karon nga season. Naapil siya sa All-Star selection sud sa upat ka sunod-sunod nga higayon.

Sa iyang bahin, si Simmons, 24-anyos nag-average og 16.1 points, 7.9 rebounds ug 7.6 assists sa 31 ka mga duwa.  Ikatulo kini niya nga naapil sa All-Star selection.

Si Embiid gikuhang starter sa Team Durant, samtang si Simmons reserba sa Team LeBron.