Gobert, Mitchell gipamulta sa NBA

CEBU, Philippines — Ang sentro sa Utah Jazz nga si Rudy Gobert ug guwardiya niining si Donovan Mitchell, kinsa nakatabang sa koponan ngadto pagrehistro og labing nindot nga rekord sa NBA, gipamulta sa liga kagahapon tungod sa pagsaway sa mga reperi. Si Gobert gipamulta og $20,000 sa iyang komento human sa 123-131 nga kapildihan sa Utah ngadto sa Philadelphia 76ers niadtong Huwebes sa sangka sa mga lider sa tagsa-tagsa ka komperensiya.

Wala sab makaikyas si Mitchell, kinsa gipamulta og $25,000 sa iyang mga komento ug sa gipakitang batasan sa pagbiya niya sa korte human na-ejected dihang gitawagan kini og duha ka technical fouls sa nahabiling 30.8 segundos diin iyang gipukpuk ang usa ka water cooler dayon niyang biya.

Gipahamtang ang silot pipila ka oras human sila si Mitchell ug Gobert gikuha nilang LeBron James ug Kevin Durant aron ipuno sa ilang line-up alang sa NBA All-Star Game didto sa Atlanta ugmang adlawa.

Gikuha si Mitchell isip reserba sa Team Durant, samtang si Gobert sa Team LeBron. "No slander to the Utah Jazz," matud pa ni James sa team nga adunay kinadaghanan og daog sa NBA uban ang 27-9 win-loss record.

Si Mitchell gisilotan niadtong Sabado human nipasangil sa mga opisyal nga dili makiangayon ang ilang pagtratar sa Utah ug nahimong kataw-anan ang officiating sa mga duwa nga naglakip sa Jazz.

"It's tough to go out there and see how we fight and compete and to have a game like that taken away from us," matud pa niya. "I'm sick of it, man. We all are. It's really getting out of hand... and the league needs to do something about it."

Ang 76ers nihimo og 27-of-35 sa free throw line, samtang ang Jazz dunay 14-for-19, nagpakita og usa ka kalainan nga nakapukling ni Gobert.

"Our guys are not able to get calls everybody else in the ... league gets," sumala pang Gobert. "We know we are the Utah Jazz and maybe some people don't want to see us go as far as we can go, but it's disappointing.

"Three times in a row, Mike Conley is going to the rim and they are grabbing him right in front of the officials and there are no calls. And on the other end there are calls that are invisible that are being made."

Nitawag niini si Gobert nga walay pagtahod sa sports ug sa Jazz ug miingon nga bation unta og kauwaw ang mga opisyal sa higayon ilang tan-awon ang duwa sa video.