Slaughter gibaylo ni Standhardinger

CEBU, Philippines — Natay-og na sab ang kalibotan sa PBA dihang gibuhian sa Barangay Ginebra Kings ang ilang 7-footer nga si Greg Slaughter puli kang Christian Standhardinger sa NorthPort Batang Pier sa usa ka blockbuster trade.

Ang trade giaprubahan sa PBA trade committee niadtong Huwebes nga mitapos sa duha ka semana nga espekulasyon sa kapalaran sa duha ka mga higanteng basketbolista.

Mao kini ang "one-on-deal" nga nahitabo sa usa sa labing dakong liga nga naglambigit og dagkong mga magduduwa nga nagpahinumdum sa nangaging mga kasabotan sama sa Mon Fernandez-Abet Guidaben, Jerry Codinera-Andy Seigle ug Marlou Aquino-Jun Limpot trades.

Sa sinugdan, adunay hugon-hugon kabahin sa sophomore guard Jerrick Balanza nga ipuno sa maong sabot-sabot tungod sa playing condition ni Slaughter kay wala na kini makaduwa pa sukad kini nibakasyon og usa ka tuig.

Ang pabuhi ni Slaughter maoy mitapos sa walo ka tuig niya nga pagpasilong sa prangkisa sa Ginebra nga nikuha niya isip No. 1 overall pick sa 2013 draft.

Bisan gihamok og injuries, si Slaughter nakapakita gihapon og maayong labok uban sa Ginebra nga gihatagan niya og upat ka kampiyonato.

Nahimo siyang "Best Player of the Conference" sa 2017 Governors' Cup, naapil sa Mythical First ug Second Teams ug nidaog sa "Rookie of the Year" award.