Pacquiao-garcia fight hapit na maluto
CEBU, Philippines — Nangangkon si four-division world champion Mikey Garcia nga hapit na mapinalisar ang away nilang Pinoy ring star Manny Pacquiao karong Mayo sa wala pa hisayring binyu.
“We’re finalizing all of the details. We hope to get the exact date and location in the next few days. We’re trying to get everything done for May,” pasiatab pa ni Garcia segun sa taho ni Manouk Akopyan sa boxingscene.com.
Si Garcia mibutyag nga dugay na untang nahitabo ang engkuwentro nilang Pacquiao kon ugaling wala pa miulbo ang kalibutanong pandemiya sa miaging tuig.
Midugang si Garcia nga gamay na lang nga panahon ang kulang aron hingpit nang maselyado ang bugno nilang Pacquiao nga lagmit adto mahitabo sa Middle East.
Kon mahinayon, si Garcia nagkanayon nga away dili lamang nindot alang sa iyang karera, apan hasta sab sa mga fans.
Si Garcia (40-1, 30KOs) katapusang nakapakita og aksiyon niadtong Pebrero 29, 2020 sa dihang iyang gipilde si Jessie Vargas aron pag-angkon og balik sa iyang WBC Diamond welterweight title didto sa Ford Center at The Star sa Frisco, Texas.
Samtang si Pacquiao (62-7-2, 39KOs) wala na makaaway pa sukad midaog pinaagi sa split decision batok ni Keith Thurman aron sakmiton ang WBA 'Super' welterweight belt niadtong Hulyo 2019. Ang WBA bag-o pa hinuong milangkat sa iyang titulo gumikan sa iyang kapakyas pagdepensa niini bisan kausa.
- Latest
