Ancajas sugod na'g ensayo alang sa iyang title defense

CEBU, Philippines — Nagsugod na'g ensayo si world champion Jerwin Ancajas pangandam alang sa umaabot nga pagdepensa sa iyang International Boxing Federation (IBF) super flyweight title.

Ang garbo sa Panabo, Davao del Norte miadto sa Wild Card gym ni Hall of Famer trainer Freddie Roach niadtong weekend.

Ang 29-anyos nga si Ancajas uban sa iyang trainer nga si Joven Jimenez, lima na ka bulan na karon didto sa Estados Unidos, apan wala pa sila makahimo og pormal nga bansay-bansay hangtod napinalisar ang ilang title fight batok ni Jonatahan Rodriguez sa Mexico.

Uban ni Ancajas sa training mao si Olympic-bound pro fighter nga sil Eumir Marcial ug iyang sparmate nga si Jonas Sultan.

Kahinumduman, kaduha nauswag ang away nilang Ancajas ug Rodriguez. Una unta silang magsangka niadtong 2019, apan nadiskaril kay si Rodriguez pakyas paglukat og US visa ug gisibog kini ngadto sa Abril sa miaging tuig. Apan gisibog na sab kini tungod sa kalibotanong pandemiya. — Yoyo R. Abayan

Triple-double ni Jokic nakatabang sa Nuggets pagbuntog sa Bucks

Mikulit na sab og laing triple-double si Nikola Jokic nga dako og natabang sa kadaogan sa Denver Nuggets dihang ilang giputol ang lima ka sunod-sunod nga daog sa Milwaukee Bucks sa NBA kagahapon didto sa Milwaukee.

Si Jokic adunay 37 puntos, 11 ka assists ug 10 ka rebounds alang sa iyang ika-50 career triple-double dihang dihang gilubong sa Nuggets ang Bucks sa iskor nga 128-97.

Ikasiyam kini ka triple-double ni Jokic karon nga season.

Mitampo si Jamal Murray  og 24 puntos sa Nuggets nga nakatagamtam sa ilang ikatulong sunod-sunod nga daog.  Si Giannis Antetokounmpo mibagnos og 27 puntos ug milangkat og walo ka rebounds aron pangulohang ang Bucks, samtang si Khris Middleton mitampo'g 20 puntos.

Mao kini ang ikatulong higayon niini nga season nga ang total points sa Bucks wala makaabot og 100.

Nabaraw sab si Antetokounmpo sa iyang pag-iskor og dili momenos sa 35 puntos sud sa upat ka sunod-sunod nga mga duwa. Ang reigning two-time MVP hapit makatabla sa rekord nga nahimo ni Kareem Abdul-Jabbar,  kinsa miiskor og 35 puntos sa lima ka sagunson nga duwa sa duha ka managlahing okasyon atol sa 1972-1932 season. 

Didto sa Los Angeles, si Dario Saric miiskor og 10 sa iyang 21 puntos sa fourth quarter alang sa Phoenix Suns mipahubas sa Lakers, 114-104 didto sa Staples Center.

Si Mikal Bridges miabuno og 19 puntos, samtang si Devin Booker miamot og 17 puntos sa wala pa siya ma-ejected tungod sa pakiglalais sa nahibiling 7:10 sa third period.

Mipabuto og 38 puntos si LeBron James alang sa Lakers nga adunay lima ka pilde sa katapusang pito ka duwa.

Sa Boston, si Kemba Walker mihimo og 25 puntos ug unom ka assists alang sa Boston Celtics nga nakabentaha  dihang wala ang All-Star nga si Kawhi Leonard aron pagpukan sa LA Clippers, 117-112.  Dako sab og natampo si Jaylen Brown nga mihakot og 18 puntos. Sila si Jayson Tatum ug Payton Pritchard mitampo'g 14 puntos matag usa sa Celtics nga miposte sa ikatulong sunod-sunod nga daog sa unang higayon sukad niadtong Enero.