Nets nakarekober
Gipilde ang Spurs sa overtime
CEBU, Philippines — Miagi man tuod og overtime, apan ang nanulong nga Brooklyn Nets maoy mipatigbabaw batok sa San Antonio Spurs, 124-113 sa kutas nilang duwa sa NBA kagahapon.
Wala gihapon makaduwa si Kevin Durant, apan dili kini babag sa gitinguha nila nga mobangon gikan sa ilang kapildihan.
Gipangulohan ni James Harden ang daog human miiskor og 30 puntos nga gilamasan og 15 ka assists ug 14 ka rebounds alang sa ikapito niyang ‘triple-double’ sa 22 ka duwa uban sa Brooklyn sukad siya gi-trade gikan sa Houston Rockets.
Ang daog mao sab ang nibugto sa nagkadinang 17 nila ka pilde didto sa San Antonio.
Bisan wala sila si Durant ug Kyrie Irving tungod sa injury, ang Nets nagpabilin gihapon sa ikaduha sa Eastern Conference standing bitbit ang 23-12 win-loss record.
Si Irving miamot og 27 puntos ug si Bruce Brown mitampo og 23 puntos sa Nets nga nakabawi human sa ilang kapildihan ngadto sa Dallas Mavericks niadtong Biyernes nga nakaputol sa ilang walo ka sunod-sunod nga daog.
Gitapos sa Spurs ang fourth quarter pinaagi sa 10-0 aron pagpuwersa sa overtime.
Ang Brooklyn miiskor sa unang otso puntos sa overtime ug sila na ang nidiktar sa duwa hangtod natugkad ang tungason nga daog.
Sa laing mga aksiyon, Dallas Mavericks misanta sa Orlando Magic, 130-124, ang Philadelphia 76ers milubong sa Indiana Pacers, 130-114, ang Denver Nuggets mitumba sa Chicago Bulls, 118-112.
Gipilde sab sa New Orleans Pelicans ang Utah Jazz, 129-124 ug midaog sab ang Cleveland Cavaliers dihang ilang gipahagsa ang Houston Rockets sa iskor nga 101-90.
- Latest