Nietes dili mokompiyansa sa wa'y pildeng kontra

CEBU, Philippines — Human sa hataas nga pahulay diin siya nawala sa eksena sud sa duha ka tuig ug tulo ka bulan, si four-division world champion Donnie "Ahas" Nietes naglantaw sa unahan sa pagbalik niya og away uban ang tumang kahinam.

"Of course, I'm very excited to fight again. I can't wait for my ring return," angkon pa ni Nietes.

Ang garbo sa Murcia, Negros Occidental gikatakda nga makigharong batok sa wa'y pildeng Panamanian champion nga si Orlando Penalba sa "Dubai Fight Series" nga gipasiugdahan sa D4G Promotions inabagan sa Round 10 Boxing Club ug MTK Global karong Abril 3 didto sa Caesar's Palace Dubai sa United Arab Emirates.

Si Nietes, 38-anyos, katapusang miaway niadtong Disyembre 31, 2018 diin siya midaog pinaagi sa split decision batok ni three-division world champion Kazuto Ioka sa Japan aron sakmiton ang WBO title.

Wala na siya makapakita pa'g aksiyon sukad niadto.

Wala hinuon mabalaka si Nietes nga wala siya makaaway sud sa 27 ka bulan gumikan kay padayon man ang iyang pagpakondisyon bisan taliwala sa pandemiya.

"I just have to step up and train doubly hard," paambit pa ni Nietes nga hugtanon karong nag-training sa bag-o pang natukod nga gym sa iyang trainers, ang managsuong Edito ug Edmund Villamor nga nahimutang sa Barangay Pagsabungan, Mandaue City. "I want to come up with a good performance and show to everyone that nothing has changed in my fighting ability despite my long layoff."

Si Nietes nga nagbitbit og 42-1-5 record uban ang 23KOs, makigtige batok sa wa'y pilde apan bag-ohanon pang si Penalba (10-0, 2KOs), ang kasamtangang WBO Latino super flyweight champion nga wala pa makaaway gawas sa yuta niyang natawhan.

Sa kasinatian ug sa baraha niyang gikuptan, inilog kaayo sa tapad si Nietes, apan dili kini niya himuong rason nga mokompiyansa ug dispatsaron ang iyang kontra.

"I respect each of my opponent," matud pa ni Nietes. "I may be confident on my chances but that doesn't mean I'm going to take him (Penalba) lightly."