Taduran modepensa na's IBF title sa laing all-Pinoy world title fight

CEBU, Philippines — Turno na sab ni Pedro Taduran (14-2-1, 11KOs) aron panalipdan ang iyang IBF minimumweight title batok ni Rene Mark Cuarto (18-2-2, 11KOs) sa laing all-Filipino world championship match karong adlawa didto sa Bula gym sa General Santos City.

Ang 24-anyos nga si Taduran mohimo sa iyang ikaduhang pagdepensa sa titulo nga iyang nasakmit human niya gipaundang sa ikaupat nga hugna ang kababayan niyang si Samuel Salva niadtong Septiyembre 7, 2019 Jurado Hall sa Philippine Marine Corps sa Barangay Fort Bonifacio, Taguig City.

Ang garbo sa Libon, Albay unang nakadepensa sa iyang titulo human miiskor og four-round technical draw batok sa Mexican challenger niadtong Pebrero 1 sa miaging tuig didto sa Jardin Cerveza Expo, Guadalupe.

Sa iyang bahin, si Cuarto mohimo sa iyang unang away alang sa kalibotanong titulo.

Ang reigning WBO Oriental minimumweight champ gikan sa Jose Dalman, Zamboanga del Norte mipaluhod ni Jayson Francisco sa ikalimang hugna sa katapusang niyang away niadtong Disyembre 15, 2019 didto sa Robinson’s Mall atrium sa General Santos. Wala siya makapakita'g aksiyon sa miaging tuig tungod sa pandemiya.

Ang sangka nilang Taduran ug Cuarto maoy ikaunom nga world title fight diin nag-unay ang mga Pinoy'ng boksidor sa kasaysayan

Ang una nahitabo dul-an usa ka siglo na ang milabay sa dihang si Pancho Villa midepensa sa iyang world flyweight title batok ni Clever Sencio didto sa Wallace Field (nga mao na karon ang Luneta Park) didto sa Manila niadto pang 1925.