Harden, Davis highlight sa NBA All-Star Game reserves

CEBU, Philippines — Ang mga team captains sa All-Star Game nga silang LeBron James ug Kevin Durant dili na maglibog pangita aron ikauban sa ilang tagsa-tagsa ka koponan alang sa exhibition game karong Marso 7 didto sa Atlanta.

Si James Harden sa Brooklyn Nets ug Anthony Davis sa Los Angeles Lakers naapil sa 14 ka mga reserba alang sa All-Star Game nga gipahibalo sa liga niadtong Martes. Si Harden nakig-uban ni Durant sa Nets pinaagi sa trade niadtong Enero, samtang sila si Davis ug James nagkumboya aron pagdaog og kampiyonato uban sa Lakers sa miaging season.

Lain pang gihagpat isip reserves sa NBA coaches naglakip ni Portland Trail Blazers guard Damian Lillard, New Orleans Pelicans phenom Zion Williamson ug ang Utah Jazz duo nga silang  Donovan Mitchell ug  Rudy Gobert.Si Williamson moduwa sa iyang unang All-Star Game uban ni Jaylen Brown sa Boston Celtics, Zach LaVine sa Chicago Bulls ug Julius Randle sa New York Knicks.

Si Chris Paul sa Phoenix Suns mopakita sa iyang labok sa ika-11 nga All-Star Game ug  si Paul George sa  Los Angeles Clippers  mobanat sa ikapitong higayon.

Sila si James ug Durant mopili sa ilang line-up karong Marso 4. 

Uban ni James isip starters gikan sa West mao ang frontcourt players nga silang Nikola Jokic sa Denver Nuggets ug Kawhi Leonard sa LA Clippers. Ang backcourt starters mao silang Stephen Curry sa Golden State Warriors ug Luka Doncic sa Dallas Mavericks.

Ang NBA scoring leader nga si Bradley Beal sa Washington Wizards ug Kyrie Irving sa Nets maoy starting guards gikan sa East. Uban ni Durant sa frontcourt mao sila si Giannis Antetokounmpo sa Milwaukee Bucks ug Joel Embiid sa 76ers. Ang head coach 76ers nga si Doc Rivers ug iyang staff maoy motimon sa Team Durant ug ang Jazz coach nga si Quin Snyder ug yang staff mao modala sa Team LeBron.