Hawks mipakgang sa Clippers

CEBU, Philippines — Mikubit og 38 puntos si Trae Young ug ang Atlanta Hawks mibihag sa Los Angeles Clippers, 108-99 sa nagpadayong aksiyon sa NBA kagahapon didto sa State Farm Arena sa Georgia, Atlanta.

Si Young nakapundo nang daan og 14 puntos sa third period alang sa Hawks nga miputol sa nagkadinang pito ka daog sa Clippers, kinsa niduwa nga wala ang tulo ka starters. Ang leading scorers nga silang Kawhi Leonard ug Paul George wala tugti nga makaduwa tungod sa health and safety protocols, samtang ang guwardiya nga si Patrick Beverley wala sab kapakita'g aksiyon gumikan sa right knee soreness. Si Reggie Jackson maoy nangu sa Clippers uban ang 20 puntos, walo ka assists ug pito ka rebounds. Si Serge Ibaka adunay15 puntos.

Gawas ni Young, sila De'Andre Hunter ug Clint Capela miiskor sab og double figures. Si Hunter mipabuto og 22 puntos, samtang si Capela mikolekta og 13 puntos ug milangkat og 19 ka rebounds alang sa Hawks.   Ang tulo ka free throws ni Young naglawog sa Hawks og 95-85 nga labaw.

Si Jackson nikompleto sa iyang 3-point play aron mapahakan ang labaw ngadto sa 101-96, apan gitubag kini ni Kevin Huerter pinaag sa iyang 3-pointer sa fourth quarter.

Didto sa Houston, si John Walls miiskor og 24 puntos aron tabangan ang Rockets paglubong  sa Washington Wizards, 108 -88. Si Wall adunay 15 puntos ug upat ka assists sa halftime, lakip ang usa ka left-handed lay-up nga mipaabante sa  Rockets og 53-45 sa second quarter. Namugnaw siya sa third period, apan nanginit og balik sa fourth quarter aron pagseguro sa daog sa ikaduha pa lang niyang aksiyon human mapalta og lima ka duwa tungod sa sore left knee. 

Sila si Victor Oladipo ug Eric Gordon mitampo'g 20 puntos aron tabangan ang Rockets pagkulit sa ilang ikatulong sunod-sunod nga daog.

Gipangulohan sab ni Bradley Beal ang Wizards pinaagi sa iyang 33 puntos, samtang si Russell Westbrook nga niduwa og usa ka season sa Rockets miamot og 19 puntos, 11 ka assists ug pito ka rebounds sa pilderong koponan.