Pilipinas nangandam gihapon sa FIBA qualifiers bisan gikanselar ang hosting

CEBU, Philippines — Dili na mo-host ang Pilipinas sa third window sa 2021 FIBA Asia Cup  Qualifiers sa sunod bulan.

Kini ang gipahibalo sa Samahang Basketbol ng Pilipinas (SBP) niadtong Martes.

Matud pa sa SBP, nga ang final window ipahigayon unta karong Pebrero 18 hangtod sa 22 didto sa Clark, Pampanga, apan gikanselar tungod sa travel ban nga gipahamtang sa kagamhanan.

Giklaro hinuon ni SBP Special Assistant to the President Ryan  Gregorio, nga ang third window madayon sa ubang nasud.

Ang bag-ong pabalaka sa Covid-19 virus nakaaghat sa Pilipinas pagpahamtang og travel ban sa 33 ka mga nasud.

Gilauman moabot sa nasud mao ang  South Korea, Indonesia ug Thailand  sa Group A, diin ang Pilipinas naapil sa maong bracket ug ingon man ang Group C teams Australia, New Zealand, Hong Kong ug Guam.

Ang South Korean, Australia ug Hong Kong naigo sa travel ban. Dugang pa sa SBP, nga ang Tokyo nga mao unta mo-host sa Group B mibalibad sab sa pag-host tungod sa virus uban ang Qatar nga mitanyag maoy  mo-host.

Bisan dili mo-host ang Pilipinas sa February window, ang Gilas Pilipinas padayong gihapon sa ilang ensayo sud sa INSPIRE Sports Academy.

"At this point, we continue practicing. The February window can still happen. We're waiting for FIBA, in the next few days or next week, to give us an indication of what's going to happen," sumala pa SBP president Al Panlilio.

Sa pagka karon, ang Pilipinas adunay 3-0 nga baraha sa Group A, human nidaog sa Indonesia niadtong Pebrero 2020 ug duha ka daog batok sa Thailand didto sa Manama, Bahrain niadtong Nobiyembre sa miaging tuig.