Clippers mipahilom sa Thunder alang sa ikapitong sagunson nga daug

CEBU, Philippines — Nasumpayan ang nagkadinang daug sa Los Angeles Clippers ngadto sa pito human gipahilom ang Oklahoma City Thunder, 108-101 sa NBA kagahapon didto sa Staples Center sa Los  Angeles, California.

Mipatuasik og 34 puntos si Kawhi Leonard  aron mangu sa ikapitong sunod-sunod nga daug sa Clippers. Milangkat sab siya og siyam ka rebounds ug mihapos og walo ka assists. 

Si Serge Ibaka mitampo og 17 puntos ug unom ka rebounds sa Clippers nga mibuntog sa Thunder sa ikaduhang higayon sud lang sa tulo ka adlaw.

Bitbit ang 13-4 nga baraha, ang Clippers nagapos uban sa Lakers alang sa labing nindot nga rekord sa NBA.

Si Shai Gilgeous-Alexander nangu sa Thunder uban ang 23 puntos, pito ka assists ug unom ka rebounds batok sa kanhi niya koponan, samtang si George Hill mipuno og 22 puntos. Ang 3-pointer ni Hill ug ang basket ni Gilgeous-Alexander mihiwa sa labaw sa Clippers ngadto sa 102-96 sa nahabiling 1:56 sa duwa.  Pero ang dunk ang Leonard sa katapusang 4.54 maoy miselyo sa kadaugan sa Clippers. 

Sa laing mga duwa, ang Toronto Raptors midaug batok sa Indiana Pacers, 107-102, midaog sab ang Charlotte Hornets batok sa Orlando Magic, 107-104, gipilde sab sa Portland TrailBlazers ang New York Knicks, 116-113.

Gilubong sa San Antonio Spurs ang Washington Wizards, 121-101, samtang gipanitan sab og maayo sa Boston Celtics ang Cleveland Cavaliers, 141-103 ug ang Milwaukee Bucks mibihag sa Atlanta Hawks, 129-115.