Bangga sa mga kanhi kampiyon Mcgregor gitagalan lang og 25 minutos

CEBU, Philippines — Dili na gyud kapugngan, magpinaksitay na ang duha ka kanhi kampiyon nga sila si Conor McGregor ug Dustin Poirier sa  gikahinaman nilang 'rematch' sa main event sa UFC 257 karong adlawa didto sa Etihad Arena sa Yas Island, Abu Dhabi.

Ang duha parehong nakapasar sa timbang alang sa maong sangka atol sa official weigh-in kagahapon. Ang kanhi UFC two-division world champion nga si McGregor mitimbang og 155 libras, samtang ang kanhi UFC interim lightweight titleholder nga si Poirier mipatak og 156 libras. Mipasalig si American Top Team head coach Mike Brown, ang coach ni Poirier nga mas lahi ang mahitabo nga sangka sa duha karon itandi sa una nilang engkuwentro niadtong 2014 diin ang 32-anyos nga si McGregor ang nidaog sa tumang kasayon pinaagi sa first-round technical knockout. Si McGregor nagkupot og rekord nga 22-4 sa mixed martial arts.

Gawas sa mga tinagoang abilidad ni Poirier, ang nabantog nga coach nagtuo nga ang iyang batos nakabaton karon og mas hait nga mentalidad.

Samtang si Brown wala mopridiktar sa kinutoban sa away, apan migarantiya siya nga si Poirier modaog batok ni McGregor sud sa 25 minutos.

“(Poirier is) a guy that has great conditioning, a volume puncher with big power in both hands and both legs, and it doesn’t go away. He can knock you out with either hand or either leg in round 1 or round 5, and it doesn’t go away. That’s what makes him the world-class monster that he is,” matud pa ni Brown.

Sa co-main event, sila si Michael Chandler ug Dan Hooker parehong mitimbang og 156 libras, apan ang walay pildeng German-Moroccan mixed martial arts fighter nga si Ottman Azaitar dili madayon og away tungod sa paglapas sa Covid-19 safety protocols.

Ang 30-anyos nga si Azaitar gikatakda untang makigsangka ni Matt Frevola, apan gitangtang kini sa card gumikan sa iyang kalapasan.