^

Comeback fight ni Nietes karong abril sa Dubai

Emmanuel B. Villaruel (Banat) - January 23, 2021 - 12:00am

CEBU, Philippines — Human sa duha ka tuig nga wa'y kisaw, si four-division world champion Donnie 'Ahas' Nietes gikatakda nga moaway og balik sa main event sa pasundayag sa D4G Promotions inabagan sa Round 10 Boxing Club ug  MTK Global karong Abril 3 didto sa Dubai, United Arab Emirates.

Ipahibalo pa hinuon kon kinsa'y makontra ni Nietes sa umaabot nga mga adlaw.

Si Nietes wala na makaaway pa sukad midaog pinaagi sa split decision batok sa Hapon nga si Kazuto Ioka aron sakmiton ang bakanteng WBO super flyweight title niadtong Disyembre 31, 2018 didto sa Wynn Palace Cotai sa Macau.

Tulo ka bulan pa lamang sa iyang paghari, gibakantihan sa 38-anyos nga si Nietes ang iyang trono sa tinguha nga makasangka ang lain pang mga haring gangis sa 115-pound division sama nilang Roman 'Chocolatito' Gonzalez sa Nicaragua, Juan Francisco Estrada sa Mexico ug Srisaket Sor Rungvisai sa Thailand.

Idlas hinuon kaayo sa iyang mga kamot ang gilaraw ni Nietes. Nasamotan pa og baraw ang iyang plano human ang ALA Boxing nga maoy naghulma kaniya gikan sa pagka-janitor ngadto sa usa sa labing ngilngig nga mga Pinoy'ng boksidor sa kasaysayan, nanirado sa hingpit niadtong Agosto sa miaging tuig tungod sa pandemiya ug sa pagsira sa longtime TV partner niining ABS-CBN.

Dali ra hinuon nga nakakita og bag-ong panimalay sa boksing ang garbo sa Murcia, Negros Occidental human siya gikuha sa MTK Global nga mao na karon ang nagduma sa iyang karera sama sa kanhi niya ALA stablemate nga si 'Prince' Albert Pagara.

Si Pagara nga mipukan sa kababayan niining si Virgil Puton pinaagi sa unanimous decision sa iyang MTK debut niadtong Disyembre 18 sa miaging tuig didto sa IPI Sports and Recreational Sports Complex sa Dakbayan sa Mandaue, mopakita sab og aksyon sa undercard ni Nietes. Wala pa hinuon masayri kon si kinsa ang makontra ni Pagara.

DONNIE NIETES
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with