LeBron mikandos og 34 puntos sa Lakers nga mipilde sa Bucks

CEBU, Philippines — Mipahaguros og season-high 34 puntos si LeBron James aron tabangan ang Los Angeles Lakers nga magpabiling walay pilde sa gawas sa ilang korte karong nga season uban ang 113-106 nga kadaogan batok sa Milwaukee Bucks sa nagkainit nga aksiyon sa NBA kagahapon didto sa Fiserv Forum sa Milwaukee.

Gawas niini, si James nga mipasud og unom sa 10 ka itsa gikan sa 3-point arc, mihatag og walo ka assists alang sa Lakers nga adunay 8-0 sa ilang road games.

Si Kentavious Caldwell-Pope mihimo sab og season-high nga pito ka 3-pointers sa iyang 10 nga pagsuway alang sa iyang 23 puntos, samtang si Anthony Davis miambit og 18 puntos ug siyam ka rebounds.

Nakatabang sab si Montrezl Harrell nga miposa og 12 puntos gikan sa bench sa Los Angelesnga mibugha og 19 sa 37  gikan 3-point range.

Labaw ang Lakers, 63-57 sa halftime, ug sud sa maong duha ka kuwarter kapito nagtabla ug kasiyam ka higayon nagpuli-puli og labaw.

Ang Lakers milupig sa scoring sa Milwaukee, 20-8 sa kapin singko minutos ang nahabilin sa second period, apil ang kang Caldwell-Pope nga 35-footer dayong kahurot sa oras.

Sukad niadto, kontrolado sa Lakers ang second half.

Gisugdan sa Lakers ang third quarter pinaagi sa sunod-sunod nga 3-pointers nga nagbingat sa ilang labaw ngadto sa 69-57.

Natipakan hinuon sa Bucks ang labaw, 102-100 human sa lusot  si Khris Middleton sa katapusang 3:05, apan gitubag dayon kini ni Caldwell-Pope pinaagi sa pagposa og  3-pointer sa nahibiling 2:42 sa duwa.