FIBA mipino sa Korea, China, Chinese-Taipei sa wala pagsalmot sa second window
CEBU, Philippines — Gipamulta sa FIBA ang Korea, China ug Chinese-Taipei tungod sa wala nila pagsalmot sa second window sa 2021 FIBA Asia Cup qualifiers. Ang tulo gisagpa og CHF 160,000 (P8.6 million), katunga sa penalty niini nga nagkantidad og CHF 80,000 (P4.3 million) ihatag ngadto sa matag national federation nga partisipar sa sunod nga window sa qualifiers.
Gawas pa niini, ang Korea, China ug Chinese-Taipei kuhaan sab og dos puntos gikan sa ilang overall standings, diin usa ka punto mapunta ngadto sa laing partisipanteng koponan sa sunod nga window.
Kini nagpasabot nga bisan tuod ang Korea pabiling walay pilde, 2-0 sa Group A, ang ilang puntos matagak gikan sa upat ngadto sa duha, diin ang usa ka punto niini ihatag ngadto sa Pilipinas, Thailand ug Indonesia kon mosalmot sila sa February window diin ang Pilipinas ang mo-host sa bubble setup didto sa Clark, Pampanga.
Ang Korea wala moapil sa second window didto sa Bahrain tungod sa Covid-19 pandemic.
- Latest
