Bulls mikitkit makasaysayanong triple double ni Doncic
CEBU, Philippines — Mipaksit og team-high 29 puntos si Lauri Markkanen ug milangkat sab og 10 ka rebounds alang sa Chicago Bulls nga milubong sa Dallas Mavericks, 118-101 sa NBA kagahapon didto sa American Airlines Center sa Dallas, Texas.
Si Luka Doncic nilabaw na ni Michael Jordan sa career list nga adunay 29 ka triple-double uban ang 36 puntos, 16 ka rebounds ug 15 ka assists, lakip na ang pasa gikan sa luyo ngadto ni Willie Cauley-Stein alang sa usa ka dunk. Si Doncic nagkigsawo karon ni Grant Hill sa ika-15 nga dapit sa all-time list.
Si Doncic lang ang ikaupat nga player sa kasaysayan sa NBA nga mitala og dili momenos 35 puntos, 15 ka rebounds ug 15 sab ka assists sa usa ka duwa ug mao sab ang kinabataan nga nakahimo niini.
Si Garrett Temple miiskor og 17 sa iyang 21 puntos sa first half sa Bulls nga mipakgang sa ilang upat ka sunod-sunod nga pilde ug ingon pagpapas sa makasaysayanong triple-double gikan ni Doncic.
Si Kristaps Porzingis midugang og 20 puntos ug walo ka rebounds sa iyang ikatulong duwa sa Dallas human sa operasyon sa iyang tuong tuhod sa offseason.
Didto sa New York, ang Knicks mipakgang sa ilang lima ka sunod-sunod nga pilde sa pagkulit og makabungog nga kadaogan batok sa Boston Celtics, 105-75 . Si Julius Randle miposa og 20 puntos uban ang 12 ka rebounds ug si RJ Barrett mitampo'g 19 puntos ug 11 ka rebounds sa Knicks.
Si Jaylen Brown mibagnos og 25 puntos aron pangulohan ang Eastern Conference leader Boston nga niduwa nga wala si Jayson Tatum, kinsa gikuwarantin. Midaog sab ang Utah Jazz batok sa Denver Nuggets,, 109-105, ang New Orleans Pelicans mibuntog sa sa Sacramento Kings, 128-123 ug ang Los Angeles Clipper milubong sa Indiana Pacers sa iskor nga 129-96.
- Latest