Bucks Nakalingkawas

CEBU, Philippines — Namawi si Giannis Antetokounmpo gikan sa iyang timawa nga free-throw shooting aron mokabya og 31 puntos, samtang si Khris Middleton miposa og tulo ka 3-pointers sa hinapos nga bahin alang sa Milwaukee Bucks nga nakalingkawas sa Dallas Mavericks, 112-109 sa NBA kagahapon didto sa Fiserv Forum sa Milwaukee.

Ang Bucks nga mipalambo sa ilang rekord nga 9-4, miposte sa ilang ikaupat nga sunod-sunod nga daog ug miputol sab sa nagkadinang daog sa Mavs.

Parehong giusikan sa duha ka koponan ang kahigayonan gikan sa free throw line. Ang Bucks mipasud og 12 sa 25 ka free throws, diin si Antetokounmpo miposa lang og usa sa 10 ka itsa ug nasipyat sa tanang pito niya nga pagsuway atol sa fourth quarter. Ang Dallas nakapasud og unom sa 13 ka itsa.

Nakatampo sab og dako sa kadaogan si Middleton, kinsa mihipos og 25 puntos, lakip na ang usa niya ka 3-pointer nga nagtukmod sa Bucks ngadto sa 106-105 nga abante sa nahabiling 2:21 sa duwa. Milugit siya og laing 3-pointer sa nahibiling 34 segundos aron hatagan ang Bucks og kuwatro puntos nga labaw, 109-105.

Si Luka Doncic mikudlit og 28 points uban adunay 13 ka rebounds alang sa Mavs nga nakakuha sab og 22 puntos gikan ni Tim Hardaway Jr.

Ang Mavs niduwa nga wala silang Josh Richardson, Dorian Finney-Smith, Jalen Brunson, Dwight Powell ug Maxi Kleber gumikan sa health and safety protocols tunga-tunga ning pandemiya.

Kini ang ikatulong sunod-sunod nga duwa nilang Bruson, Finney-Smith ug Richardson nga wala makapakita'g aksiyon.