Pacquiao-Mcgregor fight nagkahayag

CEBU, Philippines — Gipadayag ni UFC star Conor McGregor nga ang kulukabildo sa potensiyal nga away batok ni Filipino ring legend Manny Pacquiao nagkahayag ug mahitabo kini sa dili madugay.

Si McGregor mismo nideklarar nga human sa iyang comeback fight sa UFC karong Enero 23,  ang eight-division world champion nga si Pacquiao sa walay duha-duha maoy sunod niyang sangkaon.

Sa taho sa Russian new channel rt.com, si McGregor mibutyag sa The Mac Life nga luyo sa hisgut-hisgut alang sa posibling  panagsangka uban ni Pacquiao dili na matuis.

Si McGregor mitug-an nga ang iyang pagbalik og away sa boksing, sayo nga mahitabo kay sa gilauman.

"I know the talks are intensifying for this year," matud pa McGregor.

"So I am excited for a Manny Pacquiao bout, and it's looking like it will take place this year. What time this year, I'm not sure. We're going to have to have some good discussions with Dana and with the guys and the UFC after (the Poirier fight) and see where it goes, what's there, what do we want. I am open to it all. I am ready for it all,"  dugang pa niya.

Si McGregor unang niaway sa boksing niadtong 2017 batok sa Amerikanong si Floyd Mayweather Jr., kinsa mipaundang kaniya sa ika-10 nga hugna. Maskin napilde, si McGregor sa walay duha-duha  gusto pa gihapon nga moaway, ning higayona batok ni Pacquiao.

Mao sab kini ang usa ka butang nga gilantaw sa 42-anyos nga si Pacquiao.

Si Pacquiao nga wala na makaaway human sa iyang kadaogan batok ni Keith Thurman niadtong Hulyo 2019, mipahibalo dili pa lang dugay nga gusto niya masinati ang away sa usa ka mixed martial artist.