Lakers mikulit franchise-record

CEBU, Philippines — Gilumsan sa Los Angeles Lakers atol sa ilang pagpanulong sa Oklahoma City Thunder, 128-99 aron mokulit og franchise-record nga pito ka sagunsong road victory pagsugod sa  NBA season.

Si LeBron James mipakli na sab og 26 puntos aron mangu sa opensa sa Lakers, samtang si Montrezl Harrell miamot og 21 puntos. Si Anthony Davis mitampo'g 18 puntos ug pito ka rebounds alang sa defending champion Lakers nga nidaog sa upat ka sunod-sunod nila nga duwa aron inaton ang baraha ngadto sa 10-3 nga maoy ilang labing maayo nga rekord.

Si Shai Gilgeous-Alexander miiskor og 17 puntos aron sab pangulohan ang Thunder.

Ang Lakers miabante og 24 puntos sa second period sa wala pa kitkita sa Thunder ang labaw ngadto sa 58-46 sa halftime. Si James mihipos og 15 puntos sa first half.

Si James miposa og 3-pointer atubangan ni Lu Dort, dayon mihimo og laing 3-pointer ug gi-foul ni Isaiah Roby sa sunod nga posisyon. Ang free throw ni James naghatag sa Lakers og 74-50 nga bentaha.

Sa sunod nga posisyon sa Lakers, si James nakaiskor pinaagi sa lay-up nga nihatag kaniya og nuybe puntos sud lang sa 66 segundos. Si James mipasud og upat sa unom ka itsa ug miiskor og 11 puntos sa third quarter aron tabangan ang Lakers nga moposte og 93-71 nga labaw.

Ang Lakers miugbok sa kinadak-an labaw nga 31 puntos sa fourth period.

Sa laing mga duwa, ang Dallas Mavericks mipukan sa Charlotte Hornets, 104-93, ang Milwaukee Bucks mipilde sa Detroit Pistons, 110,101, nakasabwat sab og daog ang Brooklyn Nets batok New York Knicks, 116-109, ang Memphis Grizzlies midaog sa Minnesota Timberwolves, 118-107.

Midaog sab ang LA Clippers batok New Orleans Pelicans, 111-106 ug ang Portland TrailBlazers midaog sa Sacramento Kings, 132-126.