Mavs mibagsak sa Rockets

CEBU, Philippines — Milusad og mainitong rally ang Dallas Mavericks sa fourth quarter nga ilang gihimo nilang hinagiban pagpahagsa sa Houston Rockets, 113-100 sa NBA kagahapon didto sa Toyota Center in Houston, Texas.

Si Lucak Doncic mirehistro og 'triple-double' uban ang 33 puntos, 16 ka rebounds ug 11 ka assists, samtang si Tim Hardaway Jr. miambit og 30 puntos alang sa Mavericks.

Nilabaw og tulo ang Mavs sa nahibiling siyete minutos sa wala pa sila mopigsit og 14-3 run diin ang siyete puntos niini gikan ni Hardwaway aron bingaton ang ilang bentaha ngadto sa 106-92 sa kapin dos minutos ang nahibiling oras sa duwa.  

Celtics mipukan sa Raptors

Si Jayson Tatum  miiskor og 40 puntos aron pangulohan ang Boston Celtics nga mipukan sa Toronto Raptors sa iskor nga  126-114.

Niduwa nga wala ang ilang mga banggiitang guwardiya, apan ang Celtics nakahimo gihapon sa paglabaw og 26 puntos sa second half.

Si Jayson Tatum mitala og 21 puntos sa second quarter. Mipasud siya og lima ka 3-pointers ug sab siya'y sipyat sa tanang 13 ka free throws.

Ang rookie nga si Payton Pritchard adunay 23 puntos ug walo ka assists sa 32 minutos nga pagduwa sa Celtics nga aduna na'y 5-3 nga baraha ug si Jaylen Brown mitampo'g 19 puntos.

Gikan sa bench, si Robert Williams III miamot og 11 puntos ug milangkat og 15 ka rebounds.

Heat mipahilom sa Thunder

Ang Miami Heat mipakaging sa Oklahoma City Thunder sa iskor nga 118-90 ubos sa pagpangulo ni Bam Adebayo nga adunay 20 puntos. Si Kelly Olynyk miposa og lima ka 3-pointers sa kinatibuk-an niyang 19 puntos alang sa Heat nga mag-usab-usab og starting five sud sa unom ka duwa.

Si Jimmy Butler mihaling og 18 puntos sa Miami nga milusad og 20-0 run sa third period nga midan-ag sa ilang dalan paingon sa kadaogan. Si Olynyk mitampo og 11 puntos sa maong rally, apil na ang tulo ka 3-pointers ug giinat sa Heat ang ilang labaw ngadto sa 35 puntos.