Jersey ni Jordan mikulit og record
CEBU, Philippines — Ang jersey sa retiradong NBA legend nga si Michael Jordan mikulit og world record atol sa usa ka subasta nga gipasiugdahan sa Julien's Auctions.
Ang maong jersey, apil na ang kang NBA superstar LeBron James, maoy labing paborito nga mga koleksiyon nga gipamaligya sa upat ka adlaw nga auction nga nahuman kagahapon.
Napalit ang 1984 "signing day" No. 23 jersey sa kanhi Chicago Bulls icon sa kantidad nga $320,000 kon P15.6 million.
Tungod niini, nahimo kining labing mahal nga uniporme nga nasul-ot ni Jordan sa mabulukon niyang karera diin siya nakadaog og unom ka kampiyonato uban sa Bulls niadtong dekada '90s.
Naapsan niini ang jersey nga gisul-ob ni Jordan atol sa 1998 Eastern Conference finals batok sa Indiana Pacers nga nahalin sa kantidad nga $288,000 (P14.4 million) niadtong Hulyo 18.
Si Jordan, ang kasamtangang tag-iya sa Charlotte Hornets nga bag-o pang mikubit ni Gordon Hayward gikan sa Boston Celtics, kalima na-MVP ug naapil sa NBA All-Star sud sa 14 ka higayon.
- Latest
