Ex-ALA Boys nagpanikad sa ilang Sanman debut

CEBU, Philippines — Nagpanikad na ang kanhi ALA Boys nga sila si Kevin Jake "KJ" Cataraja, Jeo "Santino" Santisima, Melvin "El Gringo" Jerusalem ug Esneth "Hard Hitter" Domingo sa giatngan nilang debut uban sa Sanman Promotions/ZIP.

Sila si Cataraja, Santisima, Jerusalem ug Domingo mao unya ang sentro sa atensiyon sa ikaduhang promosyon sa Sanman human sa lockdown nga giulohan og "Vengeance" karong Disyembre 17 didto sa Sanman Gym sa Dakbayan sa General Santos. Ang wa'y pildeng super flyweight contender nga si Cataraja (11-0, 9KOs) makigpinaksitay ni John Mark Apolinario, si one-time world title challenger Santisima (19-3, 16KOs) moasdang batok ni Marjon Piencenaves, si world title hopeful Jerusalem (15-2, 9KOs) makigsinukliay og kumo ni Jayson Francisco, samtang si Domingo (13-1, 7KOs) makigbatok ni Gerald Alvarez.

Si Cataraja, gikan sa Dakbayan sa Sugbo, maoy kasamtangang WBO Youth 115-pound champion, samtang garbo sa Aroroyo, Masbate nga si Santisima miaway alang sa WBO super bantamweight belt apan gi-TKO sa ika-11 nga hugna ni Emanuel Naverette niadtong Pebrero 22 ning tuiga didto sa MGM Grand sa Las Vegas.

Sa iyang bahin, si Jerusalem maoy kasamtangang WBC No.1 minimumweight contender, samtang si Domingo misuway og angkon sa WBA Asia flyweight title, apan napakyas human gipilde sa kababayan niyang si Alphoe Dagayloan niadtong Abril 13 sa miaging tuig didto sa Quibors Gym sa Bacoor City, Cavite.