"The Finale" sa Stay at Home Chess Challenge banatan karon

CEBU, Philippines — Ang labing hait nga manuwaay sa Stay at Home Chess Challenge magtakus sa ilang abilidad sa ikawalo ug katapusang edisyon sa binulan nga online tournament nga giulohan og "The Finale"  karong adlawa pinaagi sa lichess.org sugod sa alas-5 sa hapon.

Si event organizer International Master Kim Steven Yap miingon nga naglangkob sa mga finalists mao sila si Grandmaster Mark Paragua, IM Joel Pimentel Jr., FIDE Master Alekhine Nouri, FM Mari Joseph Turquez ug ang Sugboanong IM nga si Barlo Nadera.

Gipaabot nga mohatag kanila og lisud nga hagit mao sila si National Masters Merben Roque, Rommel Ganzon, Kyle Sevillano, Sherwin Tiu ug Kevin Codinera.

Sila si Criselda Cruz ug Dave Lavendero maoy nagkumpleto sa 12-man final cast.

Magpinug-anay sila og utok ubos sa  9-round Swiss system format nga molanat og duha ka oras. Ang mga duwa ipakita live sa Facebook page sa Cebu School of Chess.