NM Roque midaog na sab sa CEPCA super blitz
CEBU, Philippines — Ang Sugboanong National Master nga si Merben Roque milangkat sa ikaduha nilang titulo sa senemanang online tournament sa Cebu Executives and Professional Chess Association (CEPCA) human iyang gidominar Engr. Alex Chua Super Blitz 8.
Si Roque, kanhi kampiyon sa Shell National Youth Active Chess, mitali sa kinatas-ang 13.5 puntos aron makampiyon sa torneyo nga gipaluyohan nilang US-based Cepcans Engr. Alex Chua ug Engr. Jojo Dondon sa Allen, Texas.
Ang Bicolanong si Michael Lopez Tala gikan sa Albay mitapos sa ikaduhang dapit uban ang 13.0 puntos, samtang sila si Grandmaster Joey Antonio (12.5 pts.), Ted Ian Montoyo sa Bacolod (11.0 pts), ug Allan Pason sa Lapu-Lapu City (10.5 pts.) maoy mi-okupar sa ikatulo ngadto sa ikalimang puwesto.
Sa laing bahin, sila si Glicerio Pardillo Jr., NM Elwin Retanal ug Remegio Galenzoga maoy mga top Cebuano finishers.
Sila si NM Rogelio Enriquez Jr. ug Rosendo Yamyamin miangkon sa dungog isip top Cepcans A ug sila si Nic Cuizon ug Dr. Leo Lofranco isip top Cepcans B, samtang si Sheila Khan Sepanton maoy top female player.
Lain pang nag-unang mga mananaog mao sila si Randy Cabuncal ug NM Rogelio Enriquez Jr. sa Air Force Day Blitz ug Stephen Rosales sa Prexy Jerry Arena.
- Latest